رسالة من الاديب البداع : محفوط عبدو إلى رئيس الجمهورية .
سَامعْ عَنَّكْ تَخْتَيْرْ اتْكِــــيسْ ## كِيفه يَالرئيسْ افْلَمَانْ
غَيْرْ أسْمَعْ منِّي يَالرئيسْ ## كَلْمَاتْ امْنْ اكْلاَمْ الْبِظَانْ
مَا همْ كذْبْ أُلاَهمْ تَلْفِيقْ ## وَاعْلِيهمْ يكـْــدرْ حَدْ إِفِيقْ
مَنْ لَوَّلْ عسَّكْ منْ طَرِيقْ ## لَمَلْ ذَ الْفَرَّقْ مُورِيتَانْ
مَابِيكْ اكـْـبَالْ اكْـــبَالْ إلِيقْ ## مَاهُ ذَاكْ الِّ تَعْرفْ كَاَنْ
عَادْ أَلَّا وَسيِلَه لزْهِيقْ ## لَرْوَاحْ ، الرَّحْمَة وَالغفْرَانْ
وَالْكِيفَــه لَجَيْتْ امَّصِّيكْ ## بِيَ مَانِي مسْتَعْدِي فِيــــكْ
لاَ تَمْشِي فَرْ اعْلْ كَرْعَيْكْ ## وَارْعَاكْ امْنْ اكْبِيظْ إِطلْيَانْ
لُوسَخْ مَاهُو لاَهِي إِخَلِّيكْ ## تَكْـــطَعْ وَطْيَ وَانْتَ عَجْلاَنْ
وَرَاهِيَّ وَاطَمْ اعْلِيـــكْ ## وَرَانِي حَدْ امْنْ السّكَّــــانْ
مَاهِ مُخَطَّ كِيفَه ذِيكْ ## منْ مَزَالتْ شمْنْ الْفرْكـَـــانْ
لَجَيْتْ أَلْكَــــ سِيَّاسِيِّيـــنْ ## فَالْمُوَالاَتْ أُمَسْؤُولِيــــنْ
تَجْبَرْ شمْنْ النَّاسْ الرَّزِينْ ## وَامْبَشَّرْ بالْخَيْرْ أُفَرْحَانْ
وَارْعَاكْ امْنْ الْمُوَاطِنِينْ ## ذَاكْ الْخَلْقْ أَرَاهُ غَضْبَانْ
وِظَلْ إِشَاوطْ لَبَّادِينْ ## فَالشَّارعْ وَامْصَيَّفْ عَطْشَانْ
نَاكـــعْ فَا لْفَقْرْ أُفَالدَّوْدِينْ ## وَالشدَّة وَافْرُوغ ْالْحَيْوَان ْ
وِلَ عَادتْ كِيفه ذَا التَّوْ ## تَوا عْلِيهَا حمَّانْ الْجَوْ
يَالرَّئيسْ أُعَصْرَاتْ النَّوْ ## وَالضَّغْطْ الِّ يَعْيَ يَمْتَانْ
عسْ أَرَاهُولَكْ فَمْ الظَّو ## يَتْكَــــطّعْ لَجَاهْ الْحمَّانْ
وَاسْعَ رَاصَك ْوَامْشِي وَلَوْ ## تبْنِ خَيْمَة شَوْرْ الْودْيَانْ
كيفَه مَاهَ مَاهُ مَعْلُومْ ## وَالاَّ غَالبْنَ كَـــاعْ إدُومْ
وِلاَ زَيَّنْ لَكْ حَدْ الْيومْ ## تشربْ منُّ وَاسْوَ عَطْشَانْ
عسَّكْ رَاهُ شمنْ أزَكــومْ ## يَبْكــَ تخْطَاطُ فَالْكِسَانْ
وَرَاهُولَكْ مَاهُ لَسْحُومْ ## صَالحْ لَذَاكْ أُلَا بنْيَانْ
الاديب البداع : محفوط عبدو
سبحان الله
ردحذفألا الحقيقة أتوف
حياكم الله وبياكم